Náttúrubarnið Petra hafði mikinn áhuga á ræktun hverskonar. Skógrækt var henni mjög hugleikin sem og ræktun blóma. Jafnskjótt og Petra og eiginmaður hennar, Nenni fluttu inn í Sunnuhlíð 1946 hófu þau að planta trjám til að skýla fyrir kaldri norðanátt og hryssingslegri hafáttinni. Garðurinn hennar er í dag undurfagur skrúðgarður þar sem harðgerar íslenskar plöntur vaxta í bland við viðkvæmar erlendar jurtir. Má þar nefna Himalayan Poppy (Meconopsis grandis) sem með sínum fagurbláa lit vekur undrun og aðdáun.
Víða í garðinum eru setbekkir þar sem gestir geta tyllt sér og hlustað á vindinn leika í laufi trjánna og fugla syngja.

Söfnun Petru einskorðaðist ekki bara við skrautsteina. Hún safnaði einnig uppstoppuðum fuglum og eggjum, skeljum og kuðungum, lyklakippum, pennum, vasaklútum og ýmsu öðru sem gaman er að skoða. Fuglasafnið telur meira en 70 fugla, flesta íslenska en einnig nokkra erlenda flækingsfugla auk nokkurra íslenskra spendýra. Þar vekur selkópur mesta athygli en refir og minkar njóta líka hylli smáfólksins.

Eftir að hafa dáðst að steinum og andað að sér ilmi blóma er kominn tími til að setjast niður með kaffibolla og kökubita. Nú-eða súpuskál og nýbakað brauð. Í Kaffi Sunnó má fá ilmandi hágæða kaffi framleitt á Stöðvarfirði í kaffibrennslunni Kvörn, te, kakó, gosdrykki og safa. Brauðdagar Deighús, einnig staðsett á Stöðvarfirði sér gestum fyrir gómsætu sætabrauði og bragðgóðu súrdeigs-brauði.
Veitinganna er hægt að njóta inni í sólskála hússins eða úti undir beru lofti í garðinum.